(ИН МЕМОРИРАМ) Горан Атанасов-Зеко (56), скопската урбана легенда на ноќниот живот во 90-те години, по кратко боледување- вчера замина во вечноста. Неговите пријатели, познаници, бизнис соработници, со очигледна тага и во шок, оставаат безброј пораки на социјалните мрежи.
Еден од нив, Мишко Шкиљевиќ, даде предлог, првата ѕвезда на Боемска улица да ја добие газда Зеко.
Атанасов, своевремено беше менаџер на дискотеките во Скопје, разни кафулиња, а потоа и сопственик на кафулето ,,А-ха” и дискотеката ,,Хавана”.
Заедно со Сашо Пижевски-Пиже и Игор Џамбазов, во 90-те години, беше основач и член на групата ,,Хавана Бенд” која ги имаше хитовите- „Шток ми бејби“, „Нема спас“ и „Дај ми, жити се“.
Игор Џамбазов, во прошталната порака напиша:
,,Газда Зеко…не е фер. Од кога фајронтот волку рано?
Пијачките недопиени, приказните недораскажани, жените недоозборувани…
Брате Зеко…не е фер. Не беше ваков договорот.
Нели требаше да снимаме нова песна? Нели ти ќе ја пееше, оти Пиже и јас сме биле дунстери?
,,Пријатељу“ Зеко…не остави и без зборови и без солзи…
И да знаеш, ти беше еден од ретките кој имаше и во главата, и во душата, и во срцето, а и меѓу нозете. Ние само се трудевме да те имитираме.
Биди добар таму горе и чувај место на твојата маса.
Наскоро се гледаме.
Вечно твои браќа, Пиже и Игор…”.
Поетот Јовица Ивановски-Џовани му посвети песна со наслов ,,Господин човек”.
