Возможна е коалиција за изборите 2024 меѓу СДСМ, ДУИ, Алијанса, ,,Огнените” и сите други албански партии кои се ,,за” уставни измени, најави вечерва аналитичарот Петар Арсовски во ,,Топ тема” на Телма.
Дебатирајќи околу уставните измени и отпорот на ВМРО-ДПМНЕ кон нив со став дека бугарските барања се уцена, тој оваа можност, но во прашална форма, му ја најави на аналитичарот Сашо Клековски, кој е член на Извршниот одбор на ВМРО-ДПМНЕ.
Клековски смета дека дури и да има таква коалиција, нема да стасаат до 2/3 мнозинство за уставни измени. Тој рече дека и во моментов постои коалиција под име ,,европски фронт” меѓу наведените партии и дека планот им е целосна изолација на ВМРО-ДПМНЕ со наратив дека е антиевропска партија, што според него не е точно. Станува збор за фронт кој штити единствено партиски интереси, а не државни, смета Клековски.
Аналитичарот Висар Адеми рече дека е возможно по изборите ниедна албанска партија да не коалицира со ВМРО-ДПМНЕ и според него, во ноември, токму поради тоа треба да овозможат да поминат уставните измени, а за возврат од меѓународната заедница да бараат фер избори.
Според Клековски, тоа би било пораз за ВМРО-ДПМНЕ кој на избори би одел со голем товар. Најави дека партијата пред избори ќе каже како Македонија да влезе во ЕУ без уставни измени.
