Професорката Фросина Ременски, својот роденден го прослави со донација на 320 оброци во народната кујна во општината Шуто Оризари. Со звуци од песните ,,Море Сокол пие” и ,,Чае Шукарие”, разлеани во кујната, во подготовка на грашок со пилешко месо – учествуваше и самата таа, рамо до рамо со другите волонтерки. Беа поделени и парчиња торта и 600 леба.
Таа вели дека ,,хуманоста и солидарноста како цивилизациски вредности мора да ги негуваме сите како граѓани и да го негуваме и видиме човекот во секој наш сограѓани, без никакви разлики и дискриминација”.
– Ако едно дете е гладно, тоа не може да мисли на игра, на учење и на училиште. Тоа е ранливо во секој поглед.
Семејствата, што живеат на работ на егзистенцијата и се борат да обезбедат храна, имаат потреба од нашата помош – напиша Ременски.
Вели дека видела како функционираат ентузијасти и домаќини во вистинска смисла на зборот. Благодарна е што ја прифатиле нејзината понуда за помош, што е важно за неа, на нив и на заедницата.
– Во општинска ,,Народна кујна Шуто Оризари” со песна готвевме заедно со тетка Перјан, Сафија и Неврија. Подготвивме и спакувавме 320 оброци и по парче торта за мојот 44 роденден. Пред народната кујна нè пречекаа повеќе од 300 жители на Шуто Оризари. Редот пред дистрибуцијата го правеа Марсел и Селдат, а храната ја дистрибуиравме со Анет, Фадиљ, Ружди, Ќамуран и Шенго. За фото беше одговорен Фуат – раскажа професорката.
Сите вработени во Општината Шуто Оризари со голема љубов и посветеност одвојуваат еден час од работното време за дистрибуцијата на храната за своите сограѓани. Акцентираше дека голема е посветеноста на Фатима Османовска, без која многу од работите во кујната нема да бидат така лесни.
Ременски, со овој чин, ги повика сите хумани граѓани, јавни личности и функционери да помогнат за секоја хумана активност што ќе израдува деца и семејства.
– Ако го искорениме гладот, можеме да кажеме дека сме направиле нешто за заедницата и човекољубието – смета таа.
Ова прекрасно искуство ќе го повторува секогаш кога треба и може да се помогне на нашите сограѓани.
И локалната власт од Шуто Оризари се заблагодари на Ременски за хуманиот гест.
🔴 КАКО ПАВЛЕ ТРАЈАНОВ ГИ ОЦЕНИ ИНСТИТУЦИИТЕ:
https://joci.mk/2021/02/23/%D1%82%D1%80%D0%B0%D1%98%D0%B0%D0%BD%D0%BE%D0%B2-%D0%BD%D0%B0-%D1%82%D0%B224-%D0%B3%D0%BE-%D1%81%D0%BB%D0%B5%D0%B4%D0%B5%D0%BB%D0%B5-%D1%82%D0%B5%D0%BB%D0%B5%D1%84%D0%BE%D0%BD%D0%BE%D1%82-%D0%B3/
[divider style=”solid” top=”20″ bottom=”20″]
[facebook]
